Starfsmenn Hótel Borgar hafa enn sem komið er ekki farið í verkfall en Lísa Geirsdóttir hótelstjóri segir að verkföll hafi verið boðuð frá og með sjötta mars. Hótelstjórinn segist vona það besta en kveðst vera tilbúin undir það versta.
„Við erum ekki í verkfalli. Við vorum ekki ein af þeim hótelkeðjum sem áttu að fara í verkfall 28. febrúar. Við erum í góðum málum til sjötta mars eins og staðan er í dag, en ef til verkfalls kemur þurfa allir Eflingarstarfsmenn að fara út úr húsi, það er að segja allir nema stjórnendur og starfsmenn í móttökunni. En við erum búin að gera okkur klár. Það eru bara stjórnendur sem mega vinna, það er að segja hótelstjóri og aðstoðarhótelstjóri og svo eigendur hótelsins, og svo náttúrlega starfsmenn í lobbýinu sem eru ekki að fara í verkfall. Þannig að við yfirmennirnir verðum bara í því að þrífa. Ég er samt bjartsýn á að þetta leysist á næstu dögum. Ég krossa alla vega puttana, því það er mikið bókað og ofboðslega mikið að gera.”
Mikil spenna hefur ríkt í kjaraviðræðum milli Eflingar og Samtaka atvinnulífsins og sér ekki fyrir endann á deilunni. Settur sáttasemjari boðaði til fundar klukkan 20 í gærkvöldi en fundurinn virðist hafa strandað á eitt þúsund króna launahækkun ef marka má Stefán Ólafsson sérfræðing hjá Eflingu. Sæþór Benjamín Randalsson, stjórnarmaður Eflingar tjáði sig á Facebook eftir fundinn og var ekki sáttur við niðurstöðuna: „Algjör sóun á kvöldinu mínu. Samtök atvinnulífsins og Halldór Benjamín vilja hvorki semja né fallast á neinar málamiðlanir. Algjörir fasistar, virkjað með gagnsleysi Katrínar og Guðmundar.”
